NASKAH DONGENG BEURIT PINTER
Assalamu’alaikum
Wr. Wb.
Rengrengan girang pangajen anu ku
simkuring dipihormat wilujeng tepang, nepangkeun simkuring Yolanda Yahya
Pamilon Pasanggiri dongeng sunda ti Kacamatan Sindangwangi bade ngadongeng anu
judulna “Beurit Pinter”.
Kieu Caritana.
Kacaritakeun, aya dua beurit sajodo ngaliang dina gorong-gorong sisi jalan.
Dina hiji mangsa, eta dua beurit teh lahlahan arasup ka imah arek neangan
hakaneun, lantaran di jalan mah geus teu aya pupurieunnana. Pas kabeneran bae
dina luhureun meja, breh maranehna manggih endog hayam hiji. Atuh puguh bae
aratoheunnana. Karepna mah eta endog teh arek dipeupeuskeun didinya, rek tuluy
diharakan. Tapi teu tulus lantaran teu kaur ngahakan balas ngarenjag, rareuwasen ngadenge sora anu lempang jeung nu
ngaromong.
Ceuk beurit jalu “Beu, lamun kawas
kieu baemah urang teh balik nyamos euy. Ayeuna mah mending hayu urang geuwat
peupeuskeun bae eta endog teh, montong sieun-sieun!”
Ari ceuk nu bikang, “ Enyalah, geuwat hayu urang peupeuskeun, tapi kumaha
lamun kapanggihan ku jelema, pasti cilaka. Endog lapur, urang digebugan. Ari
hadena mah mending urang bawa bae ulah dihakan di dieu!”.
Ceuk nu jalu, “Ih, ari dibawa teh kumaha mawana? Ayeuna mah mending kieu
bae, eta endog urang peupeuskeun tuluy dihakan di dieu. Mun kadenge sora jelema
atuh nya geuwat lumpat ulah cicing bae.
Ceuk nu bikang, “Heueuh, najan urang lumpat oge, ari endog mah moal bakal
kapuluk, matak ge ceuk uing mah mending di bawa bae”.
Ceuk nu jalu, “His, lain kitu. Cicingnya aing rek mikir heula sakeudeung. Yeuh,
ayeuna aing manggih akal. Kieu geura dengekeun ku maneh! ku aing eta endog arek
ditangkeup bari nangkarak, pek ku maneh serednya! Gegel bae buntut aing
lalaunan, ulah tarik teuing da nyeri.
Ceuk nu bikang, “Tah, enya bae mending kitu bae. Pek geura ranggeum atuh
endogna! Kade bae ulah tarik teuing bisi peupes, keun kuring anu ngagusur na
mah”.
Tah tidinya eta endog teh ditangkeup kunu jalu, tuluy durugdug digusur kunu
bikang nepi kana liangna pre bae eta endog teh dipeupeuskeun. Hekak diharakan ku
duaan mani ngareunaheun naker turug-turug tumaninah deui henteu haringhang cara
di imah jelema. Endog hiji teh nepi ka beak, dihakanan ku duaan. Sanggeus
ngahakanan endog, eta beurit sajodo teh harees.
Mung sakitu dongeng ti simkuring mugi
aya mamfaat na, tiasa janten pangajaran keur urang sadaya, diantarana bae urang
kudu pinter, loba akal jeung ulah putus harepan lamun aya masalah.
Pamungkas ti simkuring, nyanggakeun
sabrang salayan lebet ka cabe mah henteu, nyanggakeun tambi lumayan lebet ka
sae mah henteu.
Wassalamu’alaikum
Wr. Wb.
